“Хүний эрх хамгаалагчдын сүлжээ, хамгааллын механизм” сэдвийн хүрээнд зохион байгуулж буй Хүний эрхийг хамгаалагчдын үндэсний гуравдугаар зөвлөгөөнөөс Хүний эрхийг хамгаалагчдын  үндэсний  сүлжээ байгуулахаар санал нэгдлээ. 

Энэ сарын 2, 3-ны өдөр Улаанбаатар хотод болсон уг зөвлөгөөнийг НҮБ-д зөвлөх эрхтэй, Азийн 19 оронд гишүүнчлэлтэй, хүний эрх, хөгжлийн төлөөх Азийн Форум /FORUM-ASIA/-аас Хүний эрх хөгжил төв, Глоб Интернэшнл төвтэй хамтран зохион байгуулсан юм.

Зөвлөгөөнд оролцсон 50 гаруй байгууллагын төлөөлөл Монгол улсад хүний эрхийг хамгаалагчид руу чиглэсэн шууд болон далд хэлбэрийн сүрдүүлэг, заналхийлэл нэмэгдсээр байгааг онцолж байлаа. Иймд тэднийг хамгаалж, хөгжүүлэх үндэсний механизмыг бий болгох зорилгын хүрээнд хүний эрх хамгаалагчдын  үндэсний сүлжээ байгуулахаар болсон байна.

Үндэсний сүлжээ нь хүний эрхийг хамгаалагчдад тулгамдсан аюул, эрсдэлийг бууруулах, хамгаалах нөлөөлөл хийх, тэднийг холбоо, харилцаа, уялдааг хангаж ажиллана. Түүнчлэн хүний эрхийг хамгаалагчдыг хамгаалах олон улсын хүний эрхийн механизм, стандартууд, эрсдэлд орсон үед үзүүлдэг шуурхай тусламжийн асуудлаар чадавхи бүрдүүлэхэд хувь нэмэр оруулна гэж санаачлагчид үзэж байгаа аж.